Karyerasının ikinci Monako Qran Prisində Luis Hamilton uşaqlıq arzusunu gerçəkləşdirib. Luis yarışın startında Felipe Massanın komanda yoldaşı Kimi Raykkonenlə mübarizəsindən istifadə etməklə birinci döngəyə ikinci girib. Tezliklə başlayan yağış kiçik qəzalara səbəb olub. Luis Hamilton da divara çırpılıb və boksa girməklə taktikasını dəyişib. Tezliklə mexaniklərin səhvinə görə pit-leyndən keçməklə cərimə alan Kimi Raykkonen də geri qalıb və Massanın səhvindən istifadə edən Robert Kubitsa birinci pit-stopa kimi yarışda liderlik edib.

Yağış kəsdikdən sonra qurumaqda olan trasda daha gec pitə girən Luis əsas rəqiblərini arxada buraxıb. Massanın birinci pitdən sonra Roberti keçməsinə baxmayaraq ikinci pitdən sonra polşalı sürücü mövqeyini geri qaytara bilib. Kimi Raykkonen isə pitdən Robertin qarşısında trasa qayıtsa da elə birinci döbgədəcə səhv edib və Robert Kimini də keçib. Daha gec pitə girən Force İndia-nın sürücüsü Adrian Sutil isə dördüncülüyə yüksəlib.

Niko Rosberqin qəzasından sonra trasa çıxan Təhlükəsizlik Maşını bolidləri yenə bir araya toplayıb. Restartdan dərhal sonra Adriana hücum edən Kimi tunelin çıxışında maşını saxlaya bilməyib və arxadan alman sürücünü vurub, hər iki sürücü boksa girsə də yalnız Kimi trasa qayıda bilib. Və yarışın sonuna qalmış bir neçə dövrədə yalnız sürətli dövrələr göstərməyə başlayıb.

Yarış isə Luis Hamiltonun inamlı qələbəsi ilə başa çatıb, Robert Kubitsa karyerasının ən yüksək göstəricisini bir daha təkrar edib və Felipe Massa bu trasda keçənilki nəticəsini göstərib. Karyerasının altıncı qələbəsindən sonra Luis Hamilton 38 xal toplayaraq çempionatda liderliyi ələ alıb. Kimi Raykkonen isə bu yarış xal toplamasa da ikinci yeri qoruyub, amma komanda yoldaşı Felipe Massa indi ondan cəmi bir xal geri qalır. Mühəndislər Kubokunda Ferrari 69 xalla liderdir. McLaren komandası isə 53 xalla BMW Sauber komandasını cəmi bir xal qabaqlayır.