Bu ilin yanvar-avqust aylarında Azərbaycanın nəqliyyat sektorunda yük daşınması ötən ilin eyni dövrü ilə müqayisədə 2,1%, yük dövriyyəsi isə 5,7% artıb. Dövlət Statistika Komitəsindən verilən məlumata görə, hesabat dövründə nəqliyyat vasitələri ilə daşınmış 122 mln. ton yükün 47,8%-i avtomobil nəqliyyatı vasitəsilə həyata keçirilib.
Özəl bölmənin nəqliyyat vasitələri ilə yük daşınması 7,8% artıb, bu bölməyə məxsus nəqliyyat vasitələri ilə yük daşınmasının payı nəqliyyat sektorunda 72,9% təşkil edib.
Bununla yanaşı, 2009-cu ilin yanvar-avqust aylarında ümumilikdə nəqliyyat xidmətlərinin dəyər ifadəsində həcmi əvvəlki ilin müvafiq dövrünə nisbətən 5,4% artıb.
Cari ilin yanvar-avqust ayları ərzində nəqliyyat vasitələri ilə 858,9 mln. sərnişin daşınıb və onların sayı əvvəlki ilin eyni dövrü ilə müqayisədə 7,4% artıb. Bu sahədəki fəaliyyətin 83,1%-i qeyri-dövlət bölməsinin payına düşüb, sərnişinlərin 83,1%-i avtomobil nəqliyyatı ilə daşınıb.



//apa